Luis Rubiales: Do jap dorëheqjen si president i Federatës Spanjolle të Futbollit, nuk mund të vazhdoj dot...

Luis Rubiales, në një intervistë të dhënë për gazetarin britanik Piers Morgan, njoftoi dorëheqjen e tij si president i Federatës Spanjole të Futbollit.

Gjesti i Luis Rubiales, teksa puthi Jenny Hermoso në ceremoninë e Kupës së Botës për femra në Sydnei, shkaktoi bujë dhe reagime, pasi edhe futbollistja spanjole e denoncoi atë në Prokurori për këtë veprim jokonsensual.

Rubiales ka dhënë një intervistë për gazetarin britanik Piers Morgan dhe ka deklaruar se do të japë dorëheqjen, pasi nuk mund të vazhdojë punën pas kësaj.

Pyetjes nëse do të japë dorëheqje, ai iu përgjigj: “Po, kështu do të bëj, sepse nuk mund të vazhdoj punën time”.

Dhe ai vazhdoi duke thënë: “Unë e marr këtë vendim, duke u siguruar që largimi im do të kontribuojë në stabilitetin, që do të na lejojë të sjellim Kupën e Botës 2030 në vendin tonë.

I kam dorëzuar dorëheqjen Federatës Spanjole të Futbollit dhe zëvendëspresidentit të UEFA-s. Në ato pesë vjet unë pata privilegjin e madh të drejtoja federatën spanjole. Nuk dua që futbolli spanjol të pësojë ndonjë dëm”.