'5 fëlliqësira të korruptuar Rama'/ Autoriteti i Dosjeve: Ilir Meta do gjobitet me gjobë deri në 3 milion lekë

23 Shtator 2022, 15:18Aktualitet SHKRUAR NGA REDAKSIA VOX

Autoriteti për Informimin mbi Dokumentet e ish-Sigurimit të Shtetit ka reaguar pas deklaratave të Ilir Metës në një emision mbrëmjen e djeshme, duke i cilësuar si fyerje kundrejt moralit dhe dinjitetit të personit.

Në reagimin e Autoritetit të Dosjeve thuhet se fyerje të tilla përbëjnë vepër penale, ndërsa shpreh keqardhjen kur shprehjet fyese vijnë ga një ish-zyrtar i lartë si Meta.

Autoriteti i kërkon Metës të lejojë drejtësinë të kryejë detyrën për padinë që vetë Meta ka bërë ndaj anëtarëve të Autoritetit.

Reagimi i Autoritetit të Dosjeve

Autoriteti për Informimin mbi Dokumentet e ish-Sigurimit të Shtetit në mënyrë të përsëritur konstaton, me keqardhje, se gjuha e përdorur nga ana e z. Ilir Metaj në media (Intervistë me gazetarin Sokol Balla në emisionin ‘Top story’, 22 shtator 2022) është fyese dhe cënon dinjitetin e secilit prej anëtarëve të Autoritetit.

Është e drejtë e çdo individi të shprehë lirisht mendimet e tij, por nga ana tjetër kjo liri e shprehjes kufizohet nga etika në funksion të mbrojtjes së moralit dhe dinjitetit të personave kundrejt të cilëve drejtohet.

Fyerja kundrejt moralit dhe dinjitetit të personit parashikohet si vepër penale në Kodin Penal të Republikës së Shqipërisë, i ndryshuar, neni 119, paragrafi 2, i cili parashikon se: ‘Po kjo vepër, kur kryhet botërisht, në dëm të disa personave më shumë se një herë, përbën kundërvajtje penale dhe dënohet me gjobë nga pesëdhjetë mijë gjer në tre milionë lekë.”

Autoriteti shpreh keqardhje që shprehje fyese dhe jo etike, vijnë nga ish-zyrtarë në funksionet më të larta shtetërore dhe synojnë intimidimin e trupës kolegjiale gjatë zbatimit të detyrës për informimin e publikut me dokumente të ish-Sigurimit të Shtetit.

Institucionet ligj zbatuese, përfshirë këtu edhe institucionet ku është paraqitur kallëzimi penal ndaj anëtarëve të Autoritetit, duhet të lejohen të kryejnë detyrën e tyre në këtë drejtim.

Autoriteti është i hapur për bashkëpunim me çdo subjekt dhe të gjithë të interesuarit, si dhe garanton publikun për kryerjen me integritet, ligjshmëri dhe efektivitet, jashtë ndikimit politik të veprimtarisë së tij, për informimin mbi dokumentet e ish-Sigurimit të Shtetit, nëpërmjet një procesi demokratik dhe transparent, mbrojtjes së personalitetit të individit, si dhe unitetit të pajtimit kombëtar.

Video