ZHYTJA E PALLATEVE TË ALABARIT / Kompania: Gjithçka normale, katet e para do kthehen në parkime nëntokësore!

 Kliko këtu për të tjera
Voxpress:

Tronditet futbolli/ E merr përpara treni, vdes ish-portieri i Juventusit, Alex Manninger

16 Prill 2026, 18:34Sport SHKRUAR NGA REDAKSIA VOX
Alex Manninger

Zi në botën e futbollit! Alex Manninger ka ndërruar jetë në moshën 48-vjeçare, pas një aksidenti tragjik me tren. Ish-portieri, i njohur edhe për periudhën e tij te Juventus, është përplasur nga një tren ndërsa ndodhej në makinën e tij, e cila u tërhoq për disa metra. Aksidenti fatal ndodhi pranë Salzburgut, në Austri. Ndihma e shpejtë mbërriti pothuajse menjëherë, por vetëm sa konstatoi vdekjen e Manninger. Ngjarja ndodhi rreth orës 08:20 të mëngjesit, pranë ndalesës së Pabing, në një kalim hekurudhor pa pambikëqyrje.

Manninger ndodhej në bordin e një makine Volkswagen, e cila u dëmtua rëndë. Rreth 25 pasagjerët e trenit lokal dhe makinisti mbetën të padëmtuar. Ekipet e shpëtimit dhe zjarrfikësit vullnetarë nga Nußdorf mbërritën menjëherë në vendngjarje, por për ish-futbollistin nuk kishte më asgjë për të bërë. Sipas mediave austriake, që citojnë burime policore, ekipet e emergjencës e nxorën nga makina dhe i dhanë menjëherë ndihmën e parë. Në vendngjarje u përdor edhe një defibrilator, por pa rezultat. Rrethanat e përplasjes mbeten ende të paqarta. Reagimet e klubeve të ndryshme të futbollit në rrjetet sociale kanë qenë të menjëhershme. Së fundmi, Manninger kishte dhënë një intervistë ku shpjegonte se pas tërheqjes në vitin 2017 kishte lënë plotësisht futbollin për t’iu rikthyer profesionit të mëparshëm si marangoz.

Shkaqet të paqarta, nis hetimi

Ende nuk janë të qarta rrethanat e sakta të aksidentit. Për këtë arsye është caktuar një ekspert për të rindërtuar ngjarjen. Për të kuptuar më mirë çfarë ka ndodhur, do të analizohen edhe të dhënat elektronike si të automjetit të Manninger, ashtu edhe të trenit. Gjithashtu, do të verifikohet nëse sistemi i sinjalizimit në kalimin hekurudhor ka funksionuar siç duhet. Manninger ishte i vetëm në automjet.

Me urdhër të prokurorisë, sipas mediave austriake, eksperti Gerhard Kronreif ka shkuar në vendngjarje. Detyra e tij do të jetë rindërtimi i saktë i sekuencës së ngjarjeve.

“Falë tipit të automjetit, është e mundur të analizohen me saktësi të dhënat elektronike dhe, rrjedhimisht, edhe sjellja e drejtuesit”. Gjatë karrierës së tij, Manninger ka regjistruar 33 paraqitje me kombëtaren e Austrisë dhe ka marrë pjesë edhe në Europianin e vitit 2008.

Karriera e Manninger mes Austrisë, Premier League dhe Serie A

Ish-portieri austriak e nisi karrierën te Austria Salzburg në vitin 1997, për t’u transferuar më pas te Arsenal në Premier League, ku zhvilloi 39 ndeshje. Në vitin 2001 kaloi te Espanyol dhe më pas u rikthye në Itali, duke veshur fanellat e Torino, Bologna, Brescia dhe Siena. Në vitin 2005 u rikthye te Salzburg, ndërsa tre vite më vonë kaloi te Udinese, përpara se Juventus ta afronte në skuadër. Me bardhezinjtë qëndroi nga 2008 deri në 2012, për t’u transferuar më pas në Gjermani te Augsburg, përpara se në vitin 2017 të kalonte te Liverpool, ku edhe mbylli karrierën.

Mesazhi i Juventus

Juventus, përmes kanaleve të saj zyrtare, i ka dedikuar një mesazh ngushëllimi Manninger, duke përfshirë edhe fjalët e Giorgio Chiellini, sot drejtues i klubit, por dikur shok skuadre i portierit austriak.

“Në një epokë të shënuar nga prania monumentale e Gianluigi Buffon, Manninger ka ditur të jetë gjithmonë gati kur është thirrur në detyrë, duke u bërë një pikë referimi absolute për dhomën e zhveshjes dhe një garanci në portë. Sot nuk i themi lamtumirë vetëm një sportisti të madh, por një njeriu me vlera të rralla: përulësi, përkushtim dhe një profesionalizëm i jashtëzakonshëm. Juventusi i qëndron pranë familjes së Alex dhe të gjithë të afërmve të tij në këtë moment dhimbjeje të thellë”.

Fjalët e Chiellinit: “Sot është një ditë shumë e trishtë, na lë një shok skuadre shembullor dhe një njeri me vlera të mëdha. Ciao Alex, pusho në paqe. Një mendim i fortë për familjen tënde”.


Në përputhje me standarded JTI

Video

SHIKO KANALIN NE YOUTUBE
×