Polemikat në Katar, Danimarka kërkon të dalë nga FIFA

23 Nëntor 2022, 21:01Sport SHKRUAR NGA REDAKSIA VOX
Ekipi i Danimarkes

Danimarka bëri me dije se po mendon t’i kërkojë UEFA-s tërheqjen nga FIFA, pas polemikave me shiritat e kapitenëve “OneLove” në Botërorin e Katarit.

“Nuk është një vendim që është marrë tani. Ne kemi qenë të qartë për një kohë të gjatë, e kemi diskutuar atë në rajonin nordik që nga gushti”, tha Presidenti i Federatës daneze së Futbollit, Jesper Moller.

“Unë imagjinoj se mund të ketë vështirësi nëse Danimarka largohet e vetme nga FIFA. Duhet të mendojmë se si të rivendosim besimin në FIFA. Ne duhet të vlerësojmë se çfarë ka ndodhur dhe më pas duhet të krijojmë një strategji, edhe me kolegët tanë nordikë”, shtoi ai.

Ndërsa drejtori ekzekutiv i Federatës së Futbollit (DBU), Jakub Jensen zbuloi: “Më 21 nëntor, Anglia kërkoi një takim urgjent me FIFA-n, që tha se minimumi do t’i jepte një karton të verdhë kujtdo që do të dilte me byzylykun me ylber. Është diskutuar nëse ka bazë ligjore për marrjen e kartonit të verdhë për këtë dhe doli që ka”.

Për këtë arsye, 7 skuadra evropiane që planifikonin ta përdornin u detyruan të tërhiqeshin pasi FIFA i kërcënoi me sanksione sportive. Moller deklaroi gjithashtu se Danimarka nuk do të mbështesë zyrtarisht Presidentin aktual Gianni Infantino për rizgjedhje në krye të FIFA-s, edhe pse Infantino është kandidati i vetëm.

“Ka zgjedhje presidenciale në FIFA. Në FIFA janë 211 shtete dhe e kuptoj që presidenti aktual ka deklarata mbështetjeje nga 207 vende. Danimarka nuk është në mesin e këtyre vendeve dhe nuk do të jetë”.

Video