Inter mposht Cagliari-n dhe kap Atalantën në krye, vetëm 10 minuta për Asllanin

Inter vazhdoi serinë e fitoreve në Serie A duke triumfuar 3-0 ndaj Cagliari-t në “Unipol Domus”, duke kapur Atalantën me 40 pikë në krye të renditjes, ndërsa këta të fundit kanë një ndeshje për të zhvilluar.

Cagliari, pas humbjes së ngushtë ndaj Venezias, u përpoq të reagonte, por përballja me zikaltrit, të pamposhtur në 11 ndeshjet e fundit të kampionatit, ishte një sfidë e vështirë. Në pjesën e parë, Lautaro Martínez shpërdoroi një rast të artë, duke dërguar topin mbi traversë pas një krosimi perfekt nga Nicolò Barella.

Megjithëse Cagliari krijoi disa kundërsulme të rrezikshme, pjesa e parë u mbyll pa gola, duke ruajtur rekordin e Interit si skuadra e vetme që nuk ka qenë në disavantazh në pushim këtë sezon.

Pjesa e dytë filloi me dominimin e Interit, kur Alessandro Bastoni zhbllokoi rezultatin me një goditje me kokë. Lautaro Martínez shënoi golin e dytë duke u zhbllokua pas 8 ndeshjesh pa shënuar, ndërsa Hakan Çalhano?lu vulosi fitoren nga pika e bardhë.

Mesfushori i Kombëtares, Kristjan Asllani, u aktivizua për vetëm 10 minuta në fund të takimit, duke zëvendësuar Mikhtaryan.

Kjo ishte fitorja e 27-të e Interit në vitin 2024, duke e mbyllur vitin si duhet. Ndërkohë, Cagliari vazhdon të vuajë, duke regjistruar humbjen e 10-të dhe mbetur në zonën e rënies nga kategoria.