LAJME TË NXEHTA/ Zbulohen gurë kontrabandë të fshehur në kontejnerët me kokainë!

 Kliko këtu për të tjera
Voxpress:

Cilat shtete kanë fituar më shumë Topa të Artë? Renditja sjell surpriza

27 October 2026, 18:03Sport SHKRUAR NGA REDAKSIA VOX
Cilat shtete kanë fituar më shumë Topa të Artë?
Harry Kane

Triumfi i Harry Kane në Topin e Artë 2026 e rikthen Anglinë në qendër të historisë së çmimit më prestigjioz individual të futbollit. Sulmuesi i Bayern Munich-ut i dha fund një pritjeje 25-vjeçare për anglezët, duke u bërë lojtari i pestë nga ky vend që fiton trofeun. Megjithatë, në renditjen historike sipas shteteve, Anglia mbetet pas disa prej fuqive tradicionale të futbollit evropian dhe botëror.

Në krye qëndrojnë Argjentina dhe Franca, me nga tetë Topa të Artë secila. Për argjentinasit, i gjithë koleksioni lidhet me Lionel Messi-n, i cili e ka fituar çmimin tetë herë, në vitet 2009, 2010, 2011, 2012, 2015, 2019, 2021 dhe 2023. Askush tjetër nga Argjentina nuk e ka fituar këtë trofe, por dominimi i Messi-t mjafton për ta vendosur vendin e Amerikës së Jugut në majën e klasifikimit.

Franca, nga ana tjetër, e ka ndërtuar historinë e saj përmes gjashtë futbollistëve të ndryshëm. Raymond Kopa, Michel Platini, Jean-Pierre Papin, Zinedine Zidane, Karim Benzema dhe Ousmane Dembele janë emrat që i kanë siguruar tetë çmimet francezëve. Platini spikat me tri fitore radhazi, në vitet 1983, 1984 dhe 1985, ndërsa Dembele u bë fituesi më i fundit francez përpara triumfit të Kane.

Pas dy vendeve të para vijnë Gjermania, Holanda dhe Portugalia, të gjitha me nga shtatë Topa të Artë. Gjermania i ka fituar këto çmime përmes pesë lojtarëve të ndryshëm, përfshirë Gerd Muller, Franz Beckenbauer, Karl-Heinz Rummenigge, Lothar Matthaus dhe Matthias Sammer.

Holanda ka pasur tri fitore nga Johan Cruyff dhe po aq nga Marco van Basten, ndërsa Ruud Gullit plotëson listën e fituesve holandezë.

Portugalia e ka ndërtuar pjesën më të madhe të suksesit të saj falë Cristiano Ronaldo-s. Ylli portugez e ka fituar Topin e Artë pesë herë, në vitet 2008, 2013, 2014, 2016 dhe 2017. Dy trofetë e tjerë të vendit i përkasin Eusebio-s, në vitin 1965, dhe Luis Figo-s, në vitin 2000.

Anglia renditet më poshtë, me pesë Topa të Artë të fituar nga katër futbollistë të ndryshëm. Stanley Matthews ishte i pari, në vitin 1956, ndërsa Bobby Charlton triumfoi një dekadë më vonë. Kevin Keegan e fitoi çmimin dy herë radhazi, në vitet 1978 dhe 1979, përpara se Michael Owen ta sillte për herë të fundit në Angli në vitin 2001. Pas 25 vitesh, Harry Kane e mbylli këtë pritje dhe u bashkua me një grup të veçantë emrash në historinë e futbollit anglez.

Italia dhe Brazili kanë nga pesë fitore secila, por me një shpërndarje të ndryshme mes lojtarëve. Italia i ka siguruar të gjitha përmes pesë futbollistëve: Omar Sivori, Gianni Rivera, Paolo Rossi, Roberto Baggio dhe Fabio Cannavaro. Brazili, ndërkohë, i ka fituar pesë trofetë përmes Ronaldo Nazario-s, Rivaldos, Ronaldinho-s dhe Kaka-s, me “Fenomenin” që triumfoi dy herë.

Spanja ka katër fitore, të lidhura me Alfredo di Stefano-n, Luis Suarez-in dhe Rodri-n. Megjithatë, në këtë klasifikim duhet pasur parasysh se fituesit llogariten sipas kombësisë me të cilën e fituan çmimin, jo domosdoshmërisht sipas vendit ku kanë lindur. Kjo është arsyeja pse Di Stefano figuron në historinë e Spanjës, ndonëse kishte lindur në Argjentinë.

Lista përfshin edhe vende që kanë fituar vetëm një herë, si Kroacia me Luka Modrici-n në vitin 2018, Ukraina me Andriy Shevchenko-n në vitin 2004 dhe Liberia me George Weah në vitin 1995. Ky i fundit shënoi një moment historik, pasi futbollistët jo evropianë nuk lejoheshin të konkurronin për çmimin deri në vitin 1995.


Në përputhje me standarded JTI

Video

SHIKO KANALIN NE YOUTUBE
×