SPAK mbyll hetimet dhe dërgon për GJYQ deputetin e PD!

Bëri aksident në gjendje të dehur, SPAK dërgon për gjykim deputetin, Qani Xhafa.

Xhafa akuzohet nga Prokuroria e Posaçme për kryerjen e figurës së veprës penale, “Drejtim i automjeteve në mënyrë të parregullt”.

Kjo ngjarje ka ndodhur më 11 mars të vitit 2023.

Deputeti duke drejtuar në gjendje të dehur, ka humbur kontrollin dhe ka dalë nga rruga duke u përplasur me një shtyllë të ndriçimit rrugor.

Nga aksidenti janë shkaktuar dëme të lehta materiale.

Njoftimi i SPAK:

Prokuroria e  Posaçme Kundër Korrupsionit dhe Krimit të Organizuar ka përfunduar hetimet dhe ka dërguar për gjykim procedimin penal nr.27 të vitit 2025, në ngarkim të të pandehurit Qani Xhafa, i akuzuar për kryerjen e figurës së veprës penale “Drejtim i automjeteve në mënyrë të parregullt”, parashikuar nga neni 291 i Kodit Penal.

Nga tërësia e veprimeve hetimore ka rezultuar se më 11 mars 2023, i pandehuri Qani Xhafa, aktualisht Deputet në Kuvendin e Shqipërisë,  duke drejtuar në gjendje të dehur automjetin tip Toyota me targa AB 457 IJ, në Bulevardin “Qemal Stafa”, Elbasan ka humbur kontrollin dhe ka dalë nga rruga duke u përplasur me një shtyllë të ndriçimit rrugor. Nga aksidenti janë shkaktuar dëme të lehta materiale.

I pandehuri Qani Xhafa ushtron funksionin e Deputetit në Kuvendin e Shqipërisë prej datës 19 Maj 2023.