Silvinjo flet për humbjen ndaj Suedisë: I trishtuar për rezultatin, jo për lojën

26 Mars 2024, 10:47Sport SHKRUAR NGA REDAKSIA VOX

Humbja ndaj Kilit ka ndikuar menjëherë tek kombëtarja shqiptare, e cila u paraqit me një tjetër fytyrë ndaj Suedisë, edhe pse u mposht minimalisht në Stokholm.

Të besuarit e Silvinjos zhvilluan një paraqitje pozitive, madje duke krijuar disa raste shënimi, por pa sukses. Një sfidë e karakterizuar nga vendimet e gabuara të gjyqtarit, për të cilat foli dhe trajneri Silvinjo.

Një ndërhyrje e parregullt në dëm të Armando Brojës në zonën e rreptësisë nuk u vlerësua nga rumuni Birsan. 42-vjeçari do të ishte protagonist edhe në momente të tjera, por pavarësisht këtyre episodeve, rastet para portës ishin me pikator për kuqezinjtë.

Pjesa e parë do të mbyllej pa gola, ndërsa në të dytën, një krosim i Kulusevskit në zonë gjeti të lira Nilsson që devijoi me kokë duke mposhtur Strakoshën. Në minutën e 72’ nisën zëvendësimet e Shqipërisë, aty ku u zbehën disi aksionet offensive, teksa më tej ritmi ishte më i ulët, duke bërë që sfida të mbyllej me fitoren minimale të suedezëve që vinin pas asaj disfate 5-2 nga Portugalia. Në anën tjetër, Shqipëria i humbi të dyja miqësoret e marsit, por kjo e dyta tregoi përmirësim dhe shpresë se në qershor situata do të jetë ndryshe.

Trajneri i Kombëtares, Silvinjo, në një deklaratë pas ndeshjes tha se ishte i trishtuar vetëm për humbjen, por jo për lojën që bëri skuadra.

“Ndjehem i trishtuar pasi nuk barazuam apo fituam, por nuk mund të them asgjë në dhomat e zhveshjes, se paraqitja ishte shumë e mirë. Në aspektin që kemi shpirt, djersë e zemër. Dukej sikur luanm në shtëpi, kishim mijëra shqiptarë këtu dhe kjo është e bukur dhe duhet ta transmetojmë në fushë”, tha trajneri.

Video