ZBARDHET LEJA\ Ilir Shtufi, Mark Luli dhe Aida Dushku ndryshojnë projektin, nga 14 e ngrenë “çibanin” 41 kate te Garda!

Një aferë e stërmadhe është gatuar në një nga pronat më të lakmuara publike, ku me vendime të dyshimta, territori i ish-Gardës së Republikës, në hyrje të Liqenit Artificial, është tjetërsuar. Godinat dhe garnizoni i Gardës, që ka funksionuar në atë vend që prej kohës së italianëve, po shndërrohet dita-ditës në një kantier të stërmadh, ku jepen dhe ndryshohen lejet sipas oreksit të njërës apo tjetrës palë.

Madje ndryshohen edhe studimet e të gjithë zonës, teksa leja fillimisht ishte për 14 kate dhe tashmë ka shkuar në 41 kate. Me vendime të befta të të gjithë zinxhirit, prona fillimisht u shkëmbye dhe më pas po me vendime të dyshimta leja u ndryshua. Kaq shumë “ndere” kanë bërë pronarët e pronës dhe firmës që ka marrë lejet?

Faksimile: Vendimi i KKT-së në datën 24 dhjetor 2024 për miratimin e lejes së ndërtimit

Sipas dokumenteve që ka hulumtuar VoxNews, Këshillit Kombëtar i Territorit, në datën 24 dhjetor 2024 ka vendosur “për miratimin e lejes së ndërtimit për objektin godinë me funksion hotel ‘Nova Hotel Five Star”, zyra, shërbime dhe banim 35 kate mbi tokë dhe 6 kate nëntokë me vendndodhje në Bashkinë Tiranë”.

Vendimi përcakton se projekti ka një sipërfaqe totale prej 45.400 metër katrorë, e cila është e shpërndarë në funksione të ndryshme për të mbështetur nevojat e përdoruesve dhe për të optimizuar përdorimin e hapësirave. Objektit i janë dedikuar 3 funksione kryesore; zyra, banim dhe hotel. “Çdo funksion është organizyar në mënyrë që të ofrojë kushte optimale për aktivitetet përkatëse duke sugjeruar një përvojë të kënaqshme për përdoruesit” thuhet në vendim.

Në foto: Projekti i kullës që do të ngrihet te territori i ish-Gardës së Republikës

KKTU ka përcaktuar se zyrat janë të shpërndara në një krah të objektit dhe shtrihen nga kati 0 deri në katin 16. Ky sektor përfshin një sipërfaqe prej 8.000 m2.

Më pas janë hapësira për hotelin që është gjithashtu i shpërndarë në një krah të objektit dhe shtrihet nga kati 0 deri në katin 16. Ky sektor ka një sipërfaqe prej 2,650 m2.

Më pas janë hapësirat e banimit që zhvillohet mbi katin e 18 dhe shtrihet në një sipërfaqe prej 20.350 m2. “Do të jenë gjithsej 6 kate nëntokë që janë të dedikuara për parkim dhe ambiente teknike” thuhet në vendim.

Faksimile: Firma Ferro është në pronësi të z. Ilir Shtufi dhe Mark Luli

Firma ndërtuese e këtij projekti ka ndryshuar disa duar, ku deri në vitin 2008 aksioner ka qenë edhe z. Arben Pëllumbi, deputet i PS-së dhe i shpallur investitor strategjik nga qeveria së fundmi.

Ajo quhet Ferro Beton Construction Co dhe është në pronësi të z. Ilir Shtufi dhe Mark Luli.

Faksimile: Në dokumentet e lejes thuhet se pronar i truallit është Ilir Shtufi dhe znj. Aida Dushku

Po, ku do të ndërtohet çibani 41 kate? Sipas dokumenteve, kulla do të ndërtohet në ish-pronën shtetërore në te ish-Garda e Republikës. Në letra shkruhet se pronarë aktualë janë z. Ilir Shtufi dhe znj. Aida Dushku.

Po në këto dokumente, të hulumtuara nga VoxNews, përcaktohet se projekti ka si qëllim të thyejë barriera dhe të krijojë një lidhje organike mes qytetit dhe parkut. “Duke nxjerrë përtej kufijve aktualë të Gardës dhe një pronë private, do të krijohet një hapësirë prej rreth 45.000 m2 që do të jetë plotësisht e aksesueshme për publikun. Kjo do t’u ofrojë qytetarëve një mundësi të re për tu angazhuar me natyrën dhe për të shikuar hapësira të hapura dhe të gjelbëruara duke përfshirë parqe infrastrukture të re dhe objekte publike” shkruhet rëndom në këto dokumente.

Faksimile: Në vitin 2020 qeveria vendosi që të shkëmbejë truallin aktual me një tjetër pronë në hyrje të Liqenit Artificial

Në datën 23 shtator 2020, qeveria mori një vendim me numër 763 për shkëmbimin e një sipërfaqe të pronës shtetërore “Garda e Republikës, Garnizon” me një pronë në hyrje të Parkut.

Bëhet fjalë për pronën që po ndërtohet çibani 41 kate dhe një tjetër pronë e zonjës Aida Dushku. Pronat janë me sipërfaqe 1470 metra, ku qeveria vendosi që të bëjë këtë shkëmbim, me shoqërinë “Dushku S.A”.

Në foto: Projekti fillestar ka qenë 14 kate, i denoncuar nga Belind Këlliçi disa vite më parë

Disa vite më parë, ish-kandidati i PD-së për Bashkinë e Tiranës, Belind Këlliçi, denoncoi ndërtimin te territori i Gardës së Republikës. Ai tha se me leje të diskutuara u mor një vendim për ndërtim të një pallati 14 katësh.

Por, koha kaloi dhe numri 14 u kthye nga ana tjetër, duke e bërë pallatin plot 41 katësh. U ndryshuan studime dhe u bënë projekte të reja, me qëllim që çibani i radhës të ishte sa më i lartë. Madje, në një territor ish-shtetëror dhe në hyrje të Parkut të Liqenit Artificial.

©CopyrightVoxNews

Ky artikull është ekskluziv i VoxNews, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar VoxNews dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016

vendimi i kkt se ne daten 24 dhjetor 2024 per miratimin e lejes se ndertimit

projekti i kulles qe do te ngrihet te territori i ish gardes se republikes

projekti i kulles qe do te ngrihet te territori i ish gardes se republikes2

projekti i kulles qe do te ngrihet te territori i ish gardes se republikes3

projekti i kulles qe do te ngrihet te territori i ish gardes se republikes4

projekti i kulles qe do te ngrihet te territori i ish gardes se republikes5

firma ferro eshte ne pronesi te z ilir shtufi dhe mark luli

ne dokumentet e lejes thuhet se pronar i truallit eshte ilir shtufi dhe znj aida dushku

1

2

ne vitin 2020 qeveria vendosi qe te shkembeje truallin aktual me nje tjeter prone ne hyrje te liqenit artificial

projekti fillestar ka qene 14 kate i denoncuar nga belind kellici disa vite me pare

3