Përplasje FSHZH-DPSHTRR për pistën e Formula 1 në Elbasan, anulohet tenderi 1.5 milionë euro!

Dy institucione të fuqishme janë përplasur për ndërtimin e pistës së Formula 1 në Elbasan.

Prej disa muajsh, Fondi Shqiptar i Zhvillimit dhe Drejtoria e Përgjithshme e Transportit Rrugor kanë akorduar dhjetëra miliona euro për përgatitjen e terrenit për këtë nismë të rrezikshme, ku pritet të hidhen qindra miliona euro nga taksa.

Por, duke qenë se institucionet janë vënë “në radhë” për të marrë fonde nga qeveria, kanë filluar edhe përplasjet, ku Bashkia e Elbasanit, Fondi i Zhvillimit apo Transportet kanë hapur tendera të ngjashëm për të njëjta punë.

Sipas dokumenteve që disponon VoxNews, një prej këtyre procedurave është anuluar, pasi “po ndryshohet projekti”.

Faksimile: Njoftimi i vendimit të anulimit të tenderit të Fondit Shqiptar të Zhvillimit për ndërtimin e pistës së Formula 1 në Elbasan

Pak ditë më parë, kryeministri Edi Rama deklaroi se “do të jemi i pari vend në zhvillim që hyn në ‘Formula 1’”.

Sipas tij, “jemi në hapin e fundit përpara firmosjes dhe me ndihmën e Zotit besoj do të ndodhi”. Kryeministri deklaroi se pista nuk është thjesht një cirkuit për garën, është një park ku në zemër të aktivitetit do të jetë siguria rrugore, do të jetë destinacion për të edukuar njerëzit me sigurinë rrugore.

“Me module trajnimi, edukimi, argëtimi, ky është momenti që e ka bërë projektin tonë atraktiv dhe na ka vendosur në sediljen e parë, pasi kërkesat për të marrë Formula 1 janë nga të gjithë" tha ai.

Por, kjo ngutje dhe nxitim i qeverisë për të angazhuar të gjitha institucionet ka sjellë përplasje të mëdha në akordimin e fondeve.

Madje, në një dokument të publikuar në APP pranohet edhe abuzimi. “Njoftim anulimi të tenderit me objekt ‘ngritja e infrastrukturës mbështetëse në funksion të kompleksit multi-funksional për zhvillimin e sektorëve të ndryshëm të motorizimit, Auto-Moto Park, në Bashkinë Elbasan Faza II: Ndërtimi i Tombinos në Funksion të Auto-Moto Park”.

Fondi i kësaj procedure ka qenë 137,515,514 lekë pa TVSH, me TVSH shuma shkon në mbi 1.5 milionë euro.

Fondi Shqiptar i Zhvillimit shkruan se arsyet e anulimit janë “pasi nga informacioni i marrë këto dite nga përfaqësuesit e Bashkisë Elbasan dhe përfaqësuesit e DPSHTRR, rezulton se për Auto-Moto Parkun po zhvillon procedure prokurimi dhe DPSHTRR e cila është ne fazën përfundimtare të projektit të zbatimit dhe sipas tyre, janë bërë disa ndryshime në lidhje me planin e përgjithshëm të sistemimit dhe të funksionimit të tij”.

Faksimile: Njoftimi i vendimit të anulimit të tenderit të Fondit Shqiptar të Zhvillimit për ndërtimin e pistës së Formula 1 në Elbasan

FSHZH shkruan se projekti i zbatimit të Auto-Moto Park po përgatitet nga studio ndërkombëtare dhe ka njoftuar përfituesit për disa ndryshime të cilat afektojnë në ndërtimin e tombinos tip box betonarme 2*6*3 m të parashikuar në procedurën e prokurimit.

“Ndryshimet e propozuara nga studio projektuese sjellin si rrjedhojë ndryshime në seksionin e boxit betonarme dhe në kuotën referuar terrenit të auto-motoparkut. Për këtë arsye kërkohet anulimi i procedurës së prokurimit” thuhet në këtë dokument.

Por, gjatë viteve të fundit Fondi Shqiptar i Zhvillimit ka hapur disa tendera me vlera dhjetëra miliona euro. Edhe ato të mbivendosura?!

Të parët kanë qenë “ngritja e infrastrukturës mbështetëse në funksion të kompleksit multi-funksional për zhvillimin e sektorëve të ndryshëm të motorizimit, Auto-Moto Park, në Bashkinë Elbasan”. Bëhet fjalë për loti 2, “argjinatura mbrojtëse e lumit Shkumbin”.

Me fond limit 759.108.248 lekë. Tjetri ka qenë për ndërtimin e rrugëve me fond 547.562.825 lekë.

Pra, të dy tenderët, kanë një vlerë më shumë se 13 miliardë lekë të vjetra, ose me TVSH, rreth 13 milionë euro. Krahas Fondit, Drejtoria e Transportit Rrugor ka hapur disa tendera.

©Copyright Vox News

Ky artikull është ekskluziv i Vox News, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar Vox News dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.