GËRMIMET/ Arkeologët zbulojnë se dikur Parlamenti përdorej për të bërë ligje!

 Kliko këtu për të tjera
Voxpress:

Zbulohet SKEMA\ Si u përjashtuan shqiptarët nga tenderi 2.6 mln euro i fotografimit ajror, Tan Agolli vendosi “kritere” për turqit!

30 Janar 2026, 21:32Fokus SHKRUAR NGA REDAKSIA VOX
Dritan Agolli - Foto montazh

Një kriter për punë të ngjashme gjatë 3 viteve të fundit, sa 40 % e fondit limit prej 2.6 milionë euro, ka përjashtuar të gjitha firmat shqiptare nga tenderi i fotografimit ajror. Skema e Dritan Agollit, kreut të Fondit Shqiptar të Zhvillimit, ka qenë perfekte, duke larguar nga gara të gjitha kompanitë vendase. Kriteret i janë përshtatur totalisht firmës turke, e cila në fund u shpall fituese, por vetëm pas përjashtimit të të gjitha kompanive në garë.

Duket se, sa herë që turqit futen në garë në ndonjë tender në Shqipëri, fituesi dihet. Njëjtë siç ka ndodhur me tenderin e majmë të Tunelit të Llogarasë apo edhe me Aeroportin e Vlorës, dy vepra të rëndësisë së veçantë, të cilat janë nën hetim nga Prokuroria e Posaçme, për abuzime të rënda. Për Tunelin ka akuzë konkrete, madje edhe ndaj ministres së Infrastrukturës dhe Energjisë, ndërkohë që vijojnë hetimet për Aeroportin.

Ndërkohë, VoxNews ka hulumtuar dokumentet e tenderit të fotografimit ajror, pas dështimit për ngritjen e dy satelitëve, teksa të dhënat flasin se e gjithë procedura ka qenë e paracaktuar. Agolli i FSHZH-së ka krijuar një skemë të mirëfilltë, duke ia përshtatur dokumentet vetëm turqve, ndërsa të gjitha kompanitë e tjera u skualifikuan. Një tjetër dosje e denjë për Prokurorinë e Posaçme, pasi e gjithë procedura ka qenë e paracaktuar, me dokumente standarde që iu përshtatën vetëm një kompanie, asaj fituese!

Zbulohet SKEMA Si u përjashtuan shqiptarët nga tenderi 2.6 mln euro i
Faksimile: Njoftimi i fituesit të tenderit për fotografimin ajror të territorit të Republikës së Shqipërisë

Ditët e fundit është finalizuar tenderi për ndërhyrje pë përditësimin e sistemit kombëtar të të dhënave gjeohapësinore. Bëhet fjalë për fotografimin ajror, dixhital të territorit të Republikës së Shqipërisë, si dhe prodhimi i imazheve ajrore. Fondi limit ka qenë 260 milionë lekë, ose rreth 2.6 milionë euro, me një kohëzgjatje prej 24 muajsh.

Ofertë ka dhënë kompania “Mescio?lu Mühendislik ve Mü?avirlik A.?”, një kompani turke, me një vlerë prej 221 milionë lekë. Kompania Sintegra me verë 233 milionë, HP-Surveying me vlerë 209 milionë dhe Top Geo nga Beogradi me vlerë 220 milionë. Ndërkohë, në garë kanë qenë edhe dy kompani shqiptare, Gjeokonsult & Co me vlerë 231 milionë lekë dhe “Alb-Matrix Group” me vlerë 228 milionë lekë.

Zbulohet SKEMA Si u përjashtuan shqiptarët nga tenderi 2.6 mln euro i
Faksimile: Kompanitë shqiptare u skualifikuan për arsye të punëve të ngjashme gjatë 3 viteve

Në garë ka pasur kompani që ofruan më pak ose më shumë sesa firma fituese turke. Por, pavarësisht ofertave apo vlerave, ajo që vjen erë në gjithë këtë histori është arsyeja e skualifikimit të kompanive në garë.

Firma “HP-Surveying” u skualifikua për shkak të përvojës së suksesshme në realizimin e shërbimeve të ngjashme. Nuk ka “...dëshmi për shërbimet e mëparshme të ngjashme të kryera gjatë 3 (tre) viteve të fundit nga data e shpalljes së njoftimit të kontratës, në vlerën jo më të vogël se 40% e vlerës së përllogaritur të kontratës”. E njëjta arsye skualifikimi edhe për kompaninë serbe “Top Geo”.

Zbulohet SKEMA Si u përjashtuan shqiptarët nga tenderi 2.6 mln euro i
Faksimile: Arsyeja e skualifikimit të dy firmave shqiptare është se s’kanë përvojë të ngjashme për 3 vite

Në garë kanë qenë dy kompani shqiptare, “Gjeokonsult & Co” dhe “Alb Matrix Group”. Të dyja u skualifikuan për shkak të “përvojës së suksesshme në realizimin e shërbimeve të ngjashme”. Të dyja nuk paraqitën dëshmi për shërbimet e mëparshme të ngjashme të kryera gjatë 3 (tre) viteve të fundit nga data e shpalljes së njoftimit të kontratës, në vlerën jo më të vogël se 40% e vlerës së përllogaritur të kontratës”.

Një skemë e mirëfilltë e Tan Agollit, apo të atyre që e urdhëruan FSHZH-në të hap tenderin, duke qenë se gjatë 3 viteve të fundit, në Shqipëri s’është hapur asnjë tender i ngjashëm. Ku t’a gjenin përvojën e ngjashme këto kompani?

VoxNews ka mësuar se procedura e ngjashme ka qenë pothuajse 8 viteve më parë, ajo e fotografimit të qyteteve Tiranë dhe Durrës. Më pas, 0 lekë të akorduara për fotografimin ajror. Agolli ka pasur dijeni të plotë se asnjë kompani shqiptare, megjithëse i plotësojnë të gjitha kriteret e tjera me pajisje, personel e aparate të mirëfillta, nuk do t’a plotësonte këtë kriter.

Nëse nuk e plotësonin, përse nuk e bënë tenderin me subjekte mbështetëse dhe këto subjekte të merrnin përvojën në “punë të ngjashme”?! E gjithë procedura duket një “qepje” e pastër e dokumenteve për turqit, ndoshta ndonjë premtim i bërë nga krerët e shtetit tonë me ata turq, ka sjellë gjithë këtë procedurë. Por nëse tenderi ka qenë i destinuar të shkojë atje ku shkoi, përse FSHZH-ja harxhoi kohë dhe mundim të bëjë letra? Përse nuk e bëri me negocim?

Zbulohet SKEMA Si u përjashtuan shqiptarët nga tenderi 2.6 mln euro i
Faksimile: Dokumentet e tenderit në pikën 2.3 përcaktojnë se operatori ekonomik duhet të ketë punë të ngjashme gjatë 3 viteve të fundit

VoxNews ka hulumtuar dokumentet e tenderit, pikërisht pikën 2.3, që “përjashtoi” të gjithë nga konkurrimi. Në këtë pikë detajohet arsyeja e skualifikimit, atë për shërbime të mëparshme të ngjashme të krera gjatë 3 viteve të fundit.

E gjithë procedura ishte e dyshimtë në momentin e hapjes nga Fondi Shqiptar i Zhvillimit, kjo për të mbuluar procedurën e 3 viteve më parë me vlerë 6.7 milionë euro për satelitët. Tenderi i satelitëve dështoi fillimisht, teksa më pas me procedura që ende sot e kësaj dite nuk janë publikuar, satelitët “Albania 1” dhe “Albania 2” u ngritën në fillim të vitit 2023.

Ende sot e kësaj dite nuk janë publikuar detaje për firmën fituese, a janë zbatuar procedurat apo çfarë është filmuar. Institucionet shtetërore ende s’kanë në dorë filmimet e këtyre satelitëve, nëse janë apo jo efektive për erozionin, zjarret, ndërtimet pa leje apo edhe prerjen e pyjeve.

Sipas dokumenteve, FSHZH ka kaluar nga satelitët e famshëm që nuk vlejtën te avionët. Janë avionë specifikë që filmojnë territorin nga lartësia dhe prodhojnë fotografi të të gjithë zonës. Të njëjtë si avionët që kontrollonin Shqipërinë për drogë.

©Copyright Vox News

Ky artikull është ekskluziv i Vox News, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar Vox News dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016

Galeria fotografike (
)


Në përputhje me standarded JTI

Video

SHIKO KANALIN NE YOUTUBE
×