Milot-Balldre, kompania nuk gjeti fonde për koncesionin

Kompania ANK nuk ka siguruar dot financimin e nevojshëm për të ndërtuar rrugën Milot-Balldre, të përfituar përmes një PPP-je në vitin 2019. 

Ministria e Infrastrukturës i ka kërkuar kompanisë zgjidhjen e kontratës koncesionare, që në dhjetor të vitit të kaluar, pas tejkalimit të afateve të parashikuara në kontratë.

Koncesioni me vlerë 150 milionë euro u votua në Kuvend në korrik të 2019-s.

Sipas kontratës, brenda 12 muajve kompania duhej të dorëzonte projektin e rrugës prej 16 kilometra të gjatë, të kryente pagesën e sigurimit të kontratës prej dy për qind të investimit, ose rreth 3 milionë euro dhe të siguronte financimin. 

Afati u shty me një vit nga të dyja palët, por sërish kompania nuk siguroi dot financimin e nevojshëm për nisjen e punës.

Bilancet e dorëzuara nga ANK në Qendrën Kombëtare të Biznesit para se të përfitonte këtë koncesion tregonin se të ardhurat e saj ishin rreth 3 milionë euro, ose 2 për qind e kostos së investimit. /Euronews Albania