Hijet e prokurorit të SPAK/ Si Eneid Nakuçi e kaloi Vettingun dhe oponenca nga vëzhguesi Theo Jacobs

Emisioni “Inside Story” ka publikuar sonte një investigim për operacionin ndërkombëtar “Shpirti” që shkatërroi një grup organizatash shqiptare të lidhura me mafian italiane në trafikimin e kanabisit.

Në dokumentet e anti-drogës italiane zbulohet edhe dëshmia e panjohur e të penduarit që nxjerr emrin e prokurorit të SPAK-ut Eneid Nakuçi. Por pavarësisht këtij episodi, prokurori arriti të kalojë procesin e Vettingut, me gjithë problematikat e konstatuara.

***

Pyetja që ngrihet natyrshëm është, pse prokurori i Krimeve të rënda nuk është marrë në pyetje pas dëshmisë së Mariglen Shushës. Faktet përputhen me dëshminë. E vërteta është se dosja që kishte në dorë Nakuçi për trafikantët e Vlorës ishte pushuar. Emri i tij, nuk figuron as në dosjen shqiptare. Gjithçka është kaluar në heshtje. Pavarësisht këtij episodi, prokurori arriti të kalojë procesin e Vettingut, me gjithë problematikat e konstatuara.

Çështja në fjalë, nuk u diskutua farë gjatë procesit pasi askush veç kolegëve të tij nuk kishin informacion. Në procesverbalin e vendimit përfundimtar që e konfirmoi në detyrë, bie në sy fakti se është analizuar një dosje e ngjashme. Vëzhguesi ndërkombëtar Theo Jacobs ka vënë në dyshim integritetin e Nakuçit pasi më herët, ai kishte pushuar një hetim për trafik droge që i përkiste vitit 2013. Pra, një precedent që ripërsëritet.

“Janë bërë gabime thelbësore dhe serioze nga subjekti gjatë kryerjes së funksioneve si prokuror i çështjes. Nga analiza e të gjithë praktikës në dispozicion, pavarësisht nga informacioni i saktë, i detajuar dhe i besueshëm i departamentit të antinarkotikëve dhe trafiqeve në Drejtorinë Rajonale të Policisë Vlorë, pasi subjekti ka siguruar dhe emrat e individëve të dyshuar, numrat e tyre të telefonit, të dhënat nga TIMS-i dhe fotot, si dhe rekordet e tyre kriminale të përditësuara, ka regjistruar procedimin pa emra”, thuhet në vendimin e Vettingut.

Më tej, në arsyetimin e dhënë Komisioni i Pavarur i Kualifikimit thekson se nuk janë kryer përgjime ndaj dy individëve të dyshuar të çështjes bazuar në informacionet e sektorit të anti-narkotikëve. Gjatë procesit të Vettingut, komisioni ka administruar edhe një ankesë nga një qytetare e cila është përfshirë në aksident me prokurorin. Fjala është për një episod të datës 27 Tetor 2016. Qytetarja ka deklaruar se teksa udhëtonte me automjetin e saj, është përplasur nga një mjet tjetër që rezultoi se drejtohej nga prokurori Ened Nakuçi. Referuar denoncimit, prokurori ishte larguar nga vendngjarja. Këtë fakt, e kishte pranuar edhe vetë Nakuçi që ishte rikthyer në vendngjarje. Ai kishte mbajtur qëndrimin se në momentin e parë nuk kishte kuptuar kontaktin fizik dhe dëmtimet e mjetit tjetër.

Pavarësisht këtyre episodeve, prokurori i SPAK arriti të kalojë Vettingun pa asnjë problem. Oponenca e vetme ishte e vëzhguesit ndërkombëtar që theksoi problematikën me pushimin e dosjes së drogës. Një precedent që dyshohet se u përsërit me grupin e Lanit të Vlorës, një organizatë e fuqishme që u godit pas aksionit ndërkombëtar “Shpirti”.