MREKULLIA/ Emailet me perversitetet e Epsteinit rikthejnë tek shqiptarët dëshirën për të lexuar!

 Kliko këtu për të tjera
Voxpress:

Macron në Kinë kërkon ndihmë për Ukrainën, por biznesi ka më shumë rëndësi sesa gjeopolitika

4 Dhjetor 2025, 18:53Kosova&Bota SHKRUAR NGA REDAKSIA VOX
Macron dhe Xi

Çështje gjeopolitike dhe mbi të gjitha tregtare. Xi Jinping priti me nderime të larta presidentin francez Emmanuel Macron, tapet i kuq dhe 21 të shtëna topi në Sheshin Tiananmen, në vizitën e tij të katërt në Kinë.

Macron i kërkon sërish Xi-së ndihmë për t’i dhënë fund luftës në Ukrainë, më shumë investime kineze në Francë dhe një balancim të marrëdhënieve ekonomike, të cilat sot janë shumë në favor të Kinës. Nga ana e tij, Xi kërkon më shumë bashkëpunim në sektorë klasikë si industria hapësinore dhe energjia bërthamore, por edhe në fusha të reja si ekonomia e gjelbër e digjitale, inteligjenca artificiale dhe energjitë e reja.

Kriza e Ukrainës

Macron paralajmëron se rendi ndërkombëtar po rrezikon “shpërbërjen”.

“Sot dialogu mes Kinës dhe Francës është më i domosdoshëm se kurrë. Edhe kur kemi mospajtime, kemi përgjegjësinë të gjejmë rrugën për t’i kapërcyer”, thotë ai. Ai bën një thirrje të re që Kina të luajë rol aktiv për t’i dhënë fund luftës në Ukrainë:

Duhet të vazhdojmë të punojmë për paqen dhe stabilitetin në botë.

Por Xi mbetet në qëndrimin e njohur: Kina mbështet çdo përpjekje që çon drejt paqes dhe do të vazhdojë të luajë rol konstruktiv.

Ai mohon çdo përgjegjësi të Kinës në krizë dhe i kundërshton akuzat. Ndërkohë, edhe pas gati 4 vitesh nga pushtimi rus, Pekini vazhdon të ofrojë mbështetje diplomatike dhe ekonomike për Moskën.

Për Gazën, Xi njofton se Kina do të japë 100 milionë dollarë ndihma për krizën humanitare dhe për rindërtimin.

Bisedimet tregtare

Macron shoqërohet nga një delegacion prej 35 drejtuesish të kompanive të mëdha franceze (Airbus, Danone, EDF, etj.). Vizita do të vazhdojë në Chengdu, ku takimet me Xi do të jenë më informale.

Francës, që vitin e ardhshëm pret samitin e G7-s, i intereson të adresojë pabarazitë tregtare globale: vetëm në vitin 2024 defiçiti tregtar me Kinën arriti në 47 miliardë euro. Macron paralajmëron rreziqet nga prishja e zinxhirëve të furnizimit dhe i kërkon Kinës të punojnë së bashku për një ekonomi botërore të bazuar në rregulla.

“Është koha të kthejmë faqen”, thotë Macron, duke i bërë thirrje Kinës të investojë më shumë në Evropë deri në vitin 2030-ën. Xi e quan Francën “partner të pazëvendësueshëm tregtar” dhe thotë se Kina dëshiron të investojë më shumë në bateri, robotikë industriale, fotovoltaikë dhe energji eolike.

Tensionet tregtare janë rritur që nga viti i kaluar, pasi Franca mbështeti vendimin e BE-së për të vendosur tarifa ndaj makinave elektrike kineze. Kina u kundërpërgjigj me masa ndaj prodhuesve francezë të konjakut. Shumica e çështjeve tani janë zgjidhur, por disa, si mishi dhe produktet e qumështit, mbeten pezull.

Një tjetër pikë delikate janë tokat e mineraleve të rralla, të kontrolluara fort nga Kina, çka shqetëson të gjithë vendet evropiane. Pekini kërkon uljen e tensioneve dhe i bëri thirrje Francës të “mbrojë multilateralizmin” dhe të mos lejojë ndërhyrje të jashtme, një referencë e qartë ndaj SHBA-ve.

Çështja e Tajvanit

Kina shfrytëzon vizitën edhe për të kërkuar mbështetje nga Franca përballë Japonisë, pas deklaratave të kryeministres japoneze Sanae Takaichi mbi Tajvanin. Ministri i Jashtëm kinez Wang Yi i tha homologut francez se, si fituese të Luftës së Dytë Botërore, Franca dhe Kina nuk duhet të lejojnë Japoninë të “ngrejë probleme” për çështjen e Tajvanit.

Në fund të takimeve, Macron dhe Xi nënshkruan 12 marrëveshje bashkëpunimi në fusha si burimet natyrore, investimet, mirëqenia sociale, plakja e popullsisë, shkëmbimet kulturore (panda), si dhe produktet e qumështit për fëmijë./ La Repubblica


Në përputhje me standarded JTI

Video

SHIKO KANALIN NE YOUTUBE
×