'Më kërkuan audio përgjimin'/ Prokuroria i zbarkoi në shtëpi, flet xhaxhai i Aleks Nikës

25 Janar 2023, 13:15Aktualitet SHKRUAR NGA REDAKSIA VOX

Xhaxhai i Aleks Nikës ka folur pasi Prokuroria e Tiranës “zbarkoi” sot (25 janar) në shtëpinë e nipit të tij në Lezhë.

Martin Nika tha se çështja e 21 janarit është mbajtur në sirtar dhe audio përgjimin e plotë do e dorëzojnë vetëm në SPAK, pasi aty kanë besim.

“S’ka vullnet që çështja të hetohet. Është mbajtur në sirtar. Oficerët kërkuan kasetën e regjistrimit. Kasetën do ta japim vetëm në SPAK, aty besojmë”, tha xhaxhai i Aleks Nikës për News24.

Kujtojmë që gjatë ditës së djeshme Mark Nika është takuar me kreun e SPAK, Altin Dumani, një takim që e kishte kërkuar vetë familja e Nikës.

Pas takimit ai u shpreh, se Dumanit i kërkoi që ta marrë SPAK në dorë çështjen e nipit të tij, pasi ata nuk kanë më besim te Prokuroria e Tiranës.

“Shkëndija” e madhe e rihapjes së hetimeve për 21 Janarin ishte pikërisht ai audio-përgjim i cili u bë publik nga gazetari Artan Hoxha në emisionin Zona ZeroTop News.

Ditën e sotme ndërkohë SPAK ka konfirmuar marrjen e padive nga Ministri i Drejtësisë, Ulsi Manja dhe deputeti i PS, Damian Gjiknuri.

Video