21-vjeçari shqiptar në Britani rrezikon burgun, pasi hakoi gjigantët e teknologjisë

16 Nëntor 2026, 21:53Aktualitet SHKRUAR NGA REDAKSIA VOX

21-vjeçari shqiptar në Britani rrezikon burgun, pasi hakoi

Arion Kurtaj, 21-vjeçari shqiptar i përfshirë në grupin e njohur të hakerave Lapsus$, ka pranuar fajësinë për një sërë sulmesh kibernetike ndaj kompanive të mëdha ndërkombëtare, përfshirë Rockstar Games, Uber, Revolut dhe BT/EE. Vendimi për dënimin e tij pritet të shpallet më 23 nëntor 2026, në Gjykatën e Kurorës në Woolwich, Britani e Madhe.

Sipas Shërbimit të Prokurorisë së Kurorës në Britaninë e Madhe (CPS), Kurtaj ishte pjesë e një grupi kriminal kibernetik që shkaktoi dëme financiare prej miliona dollarësh, përmes ndërhyrjeve të paligjshme në sistemet kompjuterike, vjedhjes së të dhënave dhe publikimit të informacioneve konfidenciale.

Një nga rastet më të njohura lidhet me sulmin ndaj kompanisë Rockstar Games, në shtator të vitit 2022, kur 21-vjeçari arriti të siguronte akses të paautorizuar në sistemet e saj dhe të publikonte 90 video nga loja e shumëpritur Grand Theft Auto VI (GTA VI).

Pamjet, me një kohëzgjatje totale prej rreth 60 minutash, tregonin pjesë të lojës që ishte ende në fazën e zhvillimit. Materialet u publikuan në internet përmes pseudonimit “TeaPotUberHacker”. 

Sipas raportimeve të BBC-së, sulmi u realizua ndërkohë që Kurtaj ndodhej në një hotel në Bicester, nën masa kufizuese dhe pa akses në kompjuterin e tij personal. Ai dyshohet se përdori një pajisje Amazon Fire Stick, një tastierë dhe një maus Bluetooth për të depërtuar në sistemet e kompanisë.

Pas marrjes së materialeve, Kurtaj kërcënoi se do të publikonte edhe kodin burimor të lojës nëse përfaqësuesit e Rockstar Games nuk kontaktonin me të brenda 24 orëve.

Kompania raportoi se pasojat e sulmit i kushtuan rreth 5 milionë dollarë, krahas mijëra orëve pune të nevojshme për rikuperimin e sistemeve dhe menaxhimin e situatës. 

hyrë në sistemet e kompanisë britanike të telekomunikacionit BT/EE, duke siguruar akses në të dhëna dhe sisteme të brendshme.

Ky akses lidhej edhe me raste të ndërrimit të paautorizuar të kartave SIM, një metodë që u mundëson autorëve të marrin kontrollin e numrave telefonikë dhe të përdorin mesazhet e viktimave për të hyrë në llogari personale apo financiare.

Kurtaj u përfshi gjithashtu në sulme ndaj kompanisë financiare Revolut, ku u komprometuan të dhënat e mijëra klientëve, si dhe ndaj Uber, ku u sigurua akses në informacione të ndjeshme dhe sisteme të brendshme.

Sipas Prokurorisë britanike, vetëm sulmi ndaj Uber shkaktoi kosto që tejkaluan 2.8 milionë dollarë.

Prokuroria britanike: Sulmet shkaktuan dëme të konsiderueshme

Prokurori i specializuar i CPS, Robert Hutchinson, deklaroi se Kurtaj kishte përdorur metoda të avancuara për të realizuar sulme të vazhdueshme ndaj kompanive ndërkombëtare.

Ai theksoi se veprimet e të pandehurit kishin shkaktuar ndërprerje serioze të aktivitetit të bizneseve dhe kishin vënë në rrezik informacione të ndjeshme të klientëve dhe punonjësve.

Sipas prokurorit, Kurtaj kishte vijuar aktivitetin e paligjshëm edhe pasi ishte përballur me akuza të rënda penale.

Identifikimi i tij u bë i mundur përmes analizimit të pajisjeve elektronike, gjurmëve dixhitale dhe bashkëpunimit ndërmjet autoriteteve britanike dhe partnerëve ndërkombëtarë të zbatimit të ligjit. 

Nga spitali i sigurisë së lartë te pranimi i fajësisë

Çështja gjyqësore ndaj Kurtajt ka kaluar në disa faza.

Në vitin 2023, një juri në Gjykatën e Kurorës në Southwark konstatoi se ai kishte kryer veprimet që përbënin një sërë veprash penale, përfshirë hakimin, mashtrimin dhe shantazhin.

Megjithatë, për shkak të vlerësimeve mjekësore që e konsideronin të paaftë për t'iu nënshtruar një procesi të zakonshëm penal, në atë kohë nuk u mor një vendim fajësie sipas procedurës standarde.

Në dhjetor 2023, gjykata urdhëroi mbajtjen e tij në një spital të sigurisë së lartë për një periudhë të pacaktuar.

Pas rivlerësimeve mjekësore, Kurtaj u konsiderua i aftë për t'u përballur me procesin gjyqësor dhe në janar 2026 u transferua në një burg të zakonshëm.

Ai ka pranuar gjithashtu fajësinë për një incident të ndodhur në mars 2026, kur u zbulua se mbante një telefon celular në burg, të cilin e kishte përdorur për të dërguar një mesazh tallës në numrin britanik të emergjencës 999.


Video