Berisha i frymëzuar nga fitorja e Trump: Është radha jonë! Përballova bomba dhe atentate por u zotova se...

Ish-kryeministri Sali Berisha ia ka dedikuar të gjithë fjalën e tij sot në protestë fitores së Donald Trump dhe ndikimit që sipas tij rikthimi i Trump do të ketë jo vetëm në politikën brenda SHBA-së, por edhe atë globale.

Berisha beson se ka një ngjashmëri me Trump, duke thënë se siç ai i mbijetoi atentateve dhe tentativave për ta burgosur, edhe Berisha u përball me “bomba dhe atentate”, për t’u rikthyer më pas si kryeministër.

Gjatë fjalës së tij nga “arresti në shtëpi” për korrupsion dhe pastrim parash, Berisha nuk ka kursyer sulmet ndaj George Soros, duke e quajtur si mafie që do të çmontohet nga ardhja e Trump në pushtet.

Berisha fajëson Soros se e ka shpallur “non-grata” në SHBA, dhe shpreson se sanksionimi i tij do të zhbëhet nga republikanët.

Pjesë nga fjala e Berishës:

Të dashur miq, ngjarja e djeshme ka ndryshuar Amerikën, dhe për aq sa Amerika ndikon në botë, edhe botën.

Ajo ka disa mësime të mëdha për shqiptarët.

Mësimi i parë për qytetarët shqiptarë është se, rikthimi është i mundur, rikthimi është i jashtëzakonshëm.

Rikthimi i Donald Trump, pasi u përpoqën me atentate të përcaktonin presidentin e SHBA-ve është rikthim sa tokësor, aq edhe hyjnor.

Por, siç e dini dhe ju, Sali Berisha u rikthye pas rebelimit komunist. Përballoi bomba, atentate dhe çdo gjë. Por besimi i tij te shqiptarët dhe i shqiptarëve tek ai bën që i të jetë kryeministër në vitin 2005-2013.

Mos harroni, ju lutem, mos harroni kurrë takimin tonë të parë në hotel Rogner në mbledhjen e parë të Rithemelimit.

Në atë takim unë u rrëfeva ju se, një president i SHBA-ve i kishte thënë një mikut tim kur ai po fliste për mua, se në ujërat e një lumi nuk lahesh dot dy herë.

Unë, atë shtator të 2021 isha personi që në ujërat e një lumi isha larë dy herë, por u zotova se do të lahem edhe herën e tretë!

Është radha jonë, është radha jonë, është radha jonë