Shpërndau një postim për "sionistët", legjenda Gary Lineker humb vendin e punës në BBC

Gary Lineker, legjenda e futbollit anglez që u shndërrua në një personazh të famshëm mediatik, do të lërë rolin e tij si prezantues për BBC-në pasi u kritikua për ripostimin e një storie në Instagram rreth sionizmit, e cila paraqiste një fotografi të një miu.

64-vjeçari Lineker, i cili është prezantuesi më i paguar i transmetuesit kombëtar britanik me rreth 1.3 milion paund (1.7 milion dollarë) në vit, ishte gati të largohej nga emisioni kryesor i futbollit "Match of the Day" në fund të këtij sezoni, por do të qëndronte në BBC për të drejtuar mbulime të tjera të futbollit, përfshirë Kupën e Botës për meshkuj të vitit të ardhshëm.

Megjithatë, BBC tha të hënën në një deklaratë se Lineker do të tërhiqet plotësisht nga korporata pas episodit të fundit "Match of the Day" fundjavën e ardhshme, pas vendimit të tij për të ndarë një postim nga grupi, Palestina Lobby, i ilustruar me një fotografi të një miu, të titulluar: "Sionizmi i shpjeguar në dy minuta".

Minjtë, të lidhur me sëmundjet dhe papastërtinë, janë përdorur për të përfaqësuar hebrenjtë në propagandën antisemite gjatë gjithë historisë, përfshirë nga nazistët në Gjermaninë e viteve 1930. "Gary e ka pranuar gabimin që ka bërë", tha drejtori i përgjithshëm i BBC-së, Tim Davie. "Prandaj, ne kemi rënë dakord që ai të tërhiqet nga prezantimet e mëtejshme pas këtij sezoni", shtoi ai.

Lineker kishte kërkuar falje për sjelljen e tij, duke thënë javën e kaluar se kishte ripostuar materiale që më pas mësoi se përmbanin "referenca fyese", duke shtuar se e kishte tërhequr postimin sapo ishte vënë në dijeni të çështjes dhe "nuk do të ndante kurrë me vetëdije asgjë antisemite".

Para faljes së Lineker, Davie tha se korporata kishte nevojë që njerëzit të ishin "shembuj të vlerave të BBC-së dhe të ndiqnin politikat tona të mediave sociale" dhe se "kur dikush bën një gabim, na kushton".