“Lufta me terroristët në Lindjen e Mesme” anulon tenderin 625 mijë euro të ECO Tirana

Firma e pastrimit “ECO Tirana”, në pronësi 51 % të Bashkisë së Tiranës dhe 49 % të firmës italiane “AGSM AIM” ka publikuar anulimin e një tenderi.

Sipas dokumenteve që disponon VoxNews, firma ka anuluar procedurën për blerjen e një kamioni për mbeturinat.

Prej disa kohësh, firma gjysmë shtetërore ka marrë në dorë pastrimin e Tiranës, duke zëvendësuar disa nga firmat private të pastrimit. Dhe, që prej asaj kohe, “ECO Tirana” tenderon blerjen e kazanëve dhe mjeteve të pastrimit, si dhe një mori pajisjesh dhe shërbimesh të tjera.

Faksimile: Njoftimi i “ECO Tirana” për anulimin e tenderit për blerjen e kamionit

Disa muaj më parë, “ECO Tirana” hapi një tender me objekt të kontratës “blerje kamion kompatator mbeturinash”. Fondi limit i tenderit ishte 61.331.250 milionë lekë, ose 625 mijë euro.

“Arsyet e anulimit pasi në procedurat me një fazë nuk është dorëzuar asnjë ofertë e përshtatshme”, thuhet në këtë dokument. Por, më tej ka dhënë edhe një informacion shtesë, teksa thotë se firma që u shpall fituese u tërhoq nga nënshkrimi kontratës për shkak të mos përmbushjes së afatit të dorëzimit të mallit, sipas përcaktimeve.

Arsyet e anulimit

“Këto kushte nuk varen prej tij por problematikave në rrugët e transportit ujor në Lindjen e Mesme nga sulmet (luftimet) e grupeve terroriste (Forca Madhore), të cilat kanë sjell devijimin e rrugëve detare me pasojë vonesa dhe rrisqe në ardhjen brenda afateve të porosive nga prodhuesi (Kine)”, thotë ECO Tirana.

Më tej shton se anulohet tenderi pasi firma e kualifikuar se e dyta në këtë procedurë prokurimi nuk mund të shpallet fitues.