TË PAPËRGJEGJSHËM / Pemë ullinjsh shekullorë ndezin zjarr për t’u ngrohur, policia: Do ndiqen pemalisht!

 Kliko këtu për të tjera
Voxpress:

“Ekonomia e eventeve (Kanye West) shpëton shifrat e turizmit”, Gonxhja: Protestat, shqetësim për sektorin!

7 Gusht 2026, 12:26Biznes SHKRUAR NGA REDAKSIA VOX
Blendi Gonxhe/ Kanye West)

Turizmi shqiptar rikuperon ritmin e rritjes në korrik, ndërsa ekonomia e eventeve duket se ka dhënë një shtysë të rëndësishme për sezonin veror.

Ministri i Ekonomisë, Kulturës dhe Inovacionit, Blendi Gonxhja, përmes një reagimi në rrjetet sociale, e ka cilësuar këtë zhvillim si një dëshmi të rëndësisë së eventeve në ecurinë e turizmit.

“Në korrik 2026, Shqipëria u vizitua nga 1,955,099 vizitorë të huaj, kundrejt 1,825,490 vizitorëve në korrik 2025”, shkruan Gonxhja, duke theksuar se bëhet fjalë për 129,609 vizitorë më shumë, ose një rritje prej rreth 7.1% krahasuar me të njëjtin muaj të vitit të kaluar.

Sipas tij, edhe krahasimi me qershorin tregon një rikuperim të fortë. Në korrik u regjistruan 608,820 vizitorë të huaj më shumë se një muaj më parë, duke shënuar një rritje mujore prej 45.22%.

Gonxhja vëren se të dhënat dëshmojnë për një përmirësim të ndjeshëm pas ngadalësimit të regjistruar në qershor. Gjatë periudhës janar–maj 2026, rritja e numrit të vizitorëve të huaj kishte arritur në 8.2%, ndërsa në qershor ritmi zbriti në 1.3%, për t’u rikthyer në 7.1% në korrik.

“Këto rezultate tregojnë se ngadalësimi i qershorit nuk u shndërrua në një prirje të qëndrueshme rënëse”, thekson ministri, duke e konsideruar korrikun si një muaj rikuperimi të ndjeshëm për turizmin.

Megjithatë, sipas llogaritjes së paraqitur prej tij, shifrat faktike mbeten ende nën nivelin që do të arrihej nëse trendi i mëparshëm i rritjes do të ishte ruajtur. Në këtë rast, korriku do të mund të kishte regjistruar rreth 2,094,542 vizitorë të huaj.

Diferenca mes këtij skenari dhe rezultatit faktik është 139,443 vizitorë, ose rreth 6.7% më pak.

Eventet, një faktor kyç për turizmin

Në reagimin e tij, Gonxhja e vendos theksin te ekonomia e eventeve, duke e cilësuar atë si një faktor që ka ndihmuar në përmirësimin e ecurisë së sezonit.

Festivalet, itineraret tematike, festat, koncertet dhe eventet ndërkombëtare kanë krijuar flukse të reja vizitorësh, duke gjeneruar njëkohësisht aktivitet ekonomik për hotelet, restorantet, transportin, shërbimet dhe bizneset e tjera që lidhen me turizmin.

Në këtë panoramë kanë spikatur gjatë korrikut evente të mëdha artistike dhe kulturore, përfshirë eventin e YE (Kanye West) në Tiranë, koncerte dhe shfaqje të skenës së pavarur artistike, aktivitete të organizuara nga institucionet dhe bashkitë, si dhe evente ndërkombëtare e konferenca të zhvilluara në vend.

Në vëmendje kanë qenë edhe aktivitete të veçanta artistike, si nata e Zucchero, së bashku me turet tematike dhe aktivitetet që synojnë të lidhin turizmin me kulturën dhe ekonominë kreative.

Protestat dhe sulmet ndaj bizneseve, shqetësim për sektorin

Në të njëjtën kohë, ministri ngre shqetësimin për ndikimin që mund të kenë zhvillimet negative gjatë sezonit.

Sipas tij, vijimi i protestave dhe episodet e shumta të dëmshme ndaj bizneseve të industrisë shqiptare të mikpritjes gjatë korrikut përbëjnë një arsye shqetësimi për sektorin turistik.

Pavarësisht këtyre problematikave, rikthimi i rritjes në korrik tregon se ngadalësimi i qershorit nuk u konsolidua si një trend rënës.

Shifrat e korrikut, të kombinuara me efektin e eventeve, japin një sinjal pozitiv për sezonin veror, ndërsa njëkohësisht nxjerrin në pah rëndësinë e sigurisë, stabilitetit dhe një kalendari të pasur aktivitetesh për të rritur më tej flukset turistike dhe ndikimin ekonomik të sektorit.


Në përputhje me standarded JTI

Video

SHIKO KANALIN NE YOUTUBE
×