Ish-zyrtari i lartë të FBI-së i arrestuar në SHBA kishte biznes edhe në Shqipëri

Ndaj Charles McGonigal, ish-zyrtar i lartë i kundërzbulimit në FBI janë ngritur akuza për shkak se ndihmoi një oligark rus, në shkelje të sanksioneve amerikane. Gjithashtu, ndaj tij janë ngritur akuza të tjera në kuadrin e një procesi tjetër hetimor, për shkak se mori para nga një ish-oficer i shërbimit sekret shqiptar.

Charles McGonigal ka punuar për sektorin e kundërzbulimit të FBI-së, derisa u largua nga FBI-ja në shtator të vitit 2018 dhe ndër të tjera mbulonte edhe Shqipërinë dhe Bosnje-Hercegovinën.

Ai akuzohet se ka marrë 225 mijë dollarë nga një ish-punonjës i shërbimeve sekrete të Shqipërisë i identifikuar si Agron Neza dhe ka zhvilluar një sërë takimesh me biznesmenë dhe politikanë në Shqipëri, Kosovë dhe Bosnje, por pa i raportuar ato sipas rregullave.

Ndërkohë, zbulohet ish-zyrtari i FBI-së ka pasur edhe një aktivitet biznesi në Shqipëri. Ai është administrator i një studioje ligjore të quajtur ‘Laë Office and Investigation’, që nga fundi i vitit 2019 është me aktivitet të pezulluar. Charles McGonigal ka 25% të aksioneve në këtë biznes, ndërsa dy aksionerët e tjerë janë Shefqet Dizdari dhe Agron Neza. ‘Law Office and Investigation’ është një kompani e regjistruar në vitin 2008 nga Shefqet Dizdari, një avokat i njohur nga Tropoja, i cili në 2019 ai i ka shitur aksione ish-zyrtarit të lartë të FBI Mc Gonigal, Agron Nezës dhe një shtetasi tjetër të huaj, me emrin Mark Thomas Rossini.

Lidhur me këtë ccështje ka reaguar edhe deputeti socialist Erjon Braçe. Ky i fundit e ka kaluar topin te ish-kryeministri Sali Berisha. Braçe thotë se biznesmeni Shefqet Dizdari, një nga aksionerët ‘Laë Office and Investigation’ është i lidhur me Sali Berishën

“Shefqet Dizdari ka vetëm një kontratë është në 2010 e ka firmosur Berisha, gjë tjetër në fushën e naftës nuk ka. Për ca e akuzojnë Ramën, dua ta di, a ka akuzë për të në Amerikë? Është tjetër gjë nëse akuzohet në Amerikë. Nick Muzin është hetuar dhe gjykuar atje dhe është ndëshkuar atje”, tha Braçe në Report Tv.