Interi mposht Lazion dhe gjen Milanin në gjysmëfinale të Kupës së Italisë

Interi ka arritur një fitore 2-0 ndaj Lazio-s dhe ka siguruar gjysmëfinalen e Kupës së Italisë ndaj Milanit. Takimi ishte mjaft i ndezur, me një luftë të fortë në mesfushë, por Inter pati kontroll më të madh mbi posedimin e topit, ndërsa Lazio rrezikonte shpesh me kundërsulme.

Lazio pati mundësinë e parë me një goditje të pasaktë nga Boulaye Dia, ndërsa Gustav Isaksen kërcënoi disa herë nga distanca. Pavarësisht këtyre mundësive, Inter mori avantazhin në minutën e 40-të, kur Marko Arnautovic shënoi një gol të bukur me një volej të fuqishëm nga 30 metra, duke mposhtur portierin e Lazio-s, Christos Mandas. Kristjan Asllani u aktivizua në formacion në këtë ndeshje, por u zëvendësua në pjesën e dytë nga Calhanoglu.

Në pjesën e dytë, Lazio vazhdoi të kërkonte golin e barazimit, por Josep Martinez ishte i gatshëm për të ndaluar çdo tentativë. Më pas, pas një faulli në zonë ndaj Joaquin Correa, Hakan Calhanoglu realizoi një penallti për të dyfishuar epërsinë e Interit. Lazio kishte një mundësi të artë për të rikthyer shpresat, por goditja e Pedro-s u ndal nga shtylla.

Në fund, Inter arriti të mbajë rezultatin dhe e mbylli ndeshjen me fitore 2-0, duke eliminuar Lazio-n në çerekfinale për herën e pestë në gjashtë vitet e fundit në Kupën e Italisë.