U dhunua barbarisht në Tiranë, Joy Aoko rikthehet në Kenia: Do kurohet pranë familjarëve

25 Janar 2023, 17:17Aktualitet SHKRUAR NGA REDAKSIA VOX
Joyce Achieng Aoko

22 vjeçarja keniane Joyce Achieng Aoko, e cila prej disa muajsh ndodhet në gjendje kritike për jetën, është transferuar ditën e sotme drejt vendlindjes së saj në Kenia. Lajmi u bë me dije nga ministria e Jashtme e Kenias, e cila njoftoi kthimin e së resë.

Joy punonte në një kazino në Tiranë dhe disa muaj më parë, ajo u dhunua në mënyrë barbare, duke e hedhur dhe nga kati i dytë i hotelit ku qendronte, por ngjarja vazhdon të mbetet ende enigmë, teksa edhe policia e fshehu për një kohë ngjarjen.

Në një deklaratë të bërë publike më 25 janar, Departamenti i Shtetit për Çështjet e Diasporës në Kenia, njoftoi se po organizonte riatdhesimin e saj pasi gjendja e saj u përkeqësua.

“Ne e ndjemë se ishte e përshtatshme dhe në interesin më të mirë të Aokos ta sillnim në shtëpi për të përfunduar udhëtimin e saj të shërimit mes të dashurve të saj”, thuhej pjesërisht në letër.

Ndërkohë ministria e Jashtme shtoi se Aoko e cila prej muajsh ishte e shtruar në spital në Shqipëri, kishte nevojë për kujdes të specializuar mjekësor.

“Ajo u shtrua në spital për trajtim dhe është në gjendje kritike. Fatkeqësisht, ajo kishte nevojë për kujdes të specializuar neurologjik që nuk ishte i disponueshëm në Shqipëri”, tha Ministria e Jashtme e Kenias.

Joy së bashku me nënën e saj pritet të mbërrijë në aeroportin Wilson në orën 20:00, ku do të pritet nga Roseline Njogu, sekretarja e parë për Çështjet e Diasporës

Video