KRYENGRITJA/ Rebelohen deputetët e PS-së, marrin zvarrë të Gjatin të votojë ndarjen territoriale!

 Kliko këtu për të tjera
Voxpress:

Ndalni zemërimin ndaj biznesit të vogël, mos plaçkisni sepse nuk janë ata përgjegjësit për keq-qeverisjen!

15 October 2026, 13:33Aktualitet SHKRUAR NGA REDAKSIA VOX
Ndalni zemërimin ndaj biznesit të vogël, mos plaçkisni
Tiranë

Ka një vijë të kuqe mes protestës dhe anarkisë. Në Tiranë, kjo vijë është kaluar.

Të protestosh kundër korrupsionit, keqqeverisjes, çmimeve, papunësisë apo mungesës së perspektivës është një e drejtë. Të thyesh xhamin e një dyqani të vogël, të futesh në kioskë për të marrë mallin, të djegësh biznesin e dikujt apo të shkatërrosh semaforët që nesër do t’i paguajë përsëri qytetari, nuk është protestë. Është mënyra më e keqe për të rritur urrejtjen mes shqiptarëve.

Pamjet e 14 tetorit treguan grupe protestuesish që, ndërsa lëviznin nëpër Tiranë, thyen semaforë, dogjën kosha dhe automjete, dëmtuan sinjalistikën dhe hynë në kioska e dyqane të vogla duke marrë produkte. 

Ai që mban një dyqan të vogël hapur deri në darkë nuk ka firmosur tendera. Nuk ka ndarë koncesione, nuk ka bërë ligje, nuk ka administruar miliarda euro të buxhetit.

Por pikërisht atij i thyhet xhami dhe i merret malli. Qytetarit duhet të zgjohet mëngjesin tjetër dhe të numërojë dëmin.

Në Piramidën e Tiranës, protestuesit thyen xhamat e bizneseve në katin e parë, hynë në ambiente dhe disa prej tyre u përfshinë nga flakët. 

Në një nga videot që ka qarkulluar nga zona shihet edhe një pronar biznesi që përpiqet të ndalojë të rinjtë të marrin materiale nga ambienti i tij, duke u shpjeguar se ato janë puna dhe sakrifica e familjes së tij.

AFP raportoi zjarr në dy degë bankare, ndërsa burime vendase raportuan disa banka të dëmtuara dhe një bankomat të thyer. 

Por edhe këtu duhet bërë një dallim. Të protestosh kundër sistemit financiar është një gjë. Të futesh, të shkatërrosh dhe të plaçkitësh është tjetër gjë.

Sepse pas sportelit nuk është “sistemi”. Është një punonjëse me rrogë. Është roja i sigurisë. Është pastruesja. Është qytetari që nesër do të gjejë derën të mbyllur.

Nëse një 20-vjeçar hyn në biznesin e tij dhe i merr mallin, nuk po “lufton sistemin”. Po grabit një shqiptar tjetër.

Nëse i thyen xhamin një dyqani, pronari nesër nuk sheh te protestuesi një qytetar që kërkon ndryshim. Sheh njeriun që i shkatërroi punën.

Nëse i vë zjarrin një picerie, familja që jeton prej saj nuk do të mendojë për kauzën e protestës. Do të mendojë për njeriun që i la pa të ardhura.

 

Dhe këtu fillon rreziku më i madh, sepse po mbillet urrejtja mes shqiptarëve. Shqipëria ka kaluar mjaft ndarje politike, por ajo që po ndodh mund të prodhojë një ndarje edhe më të rrezikshme, qytetarin kundër qytetarit.

Nëse vazhdohet kështu, nesër nuk do të diskutojmë më për korrupsionin apo keqqeverisjen. Do të diskutojmë se cilët shqiptarë ua shkatërruan pronën shqiptarëve të tjerë.

Dhe kjo është dhurata më e madhe që mund t’i bëhet çdo pushteti, një shoqëri që, në vend që t’i kërkojë llogari atij, fillon të luftojë me vetveten.

Shqipëria ka arsye reale për zemërim. Ka korrupsion për të hetuar, pushtet për të kontrolluar, institucione për t’u kërkuar llogari dhe probleme sociale që nuk zhduken duke i mohuar.

Por pikërisht për këtë protesta duhet të jetë më e mençur se pushteti që kritikon.

Të rinjtë që duan ndryshim duhet ta kuptojnë këtë para se të jetë vonë, që mos të sulmojnë bizneset, sepse nuk janë ato përgjegjëse për keqqeverisjen.

Mos plaçkitni dyqanet, sepse varfëria nuk luftohet duke grabitur dikë që punon.

Sepse nëse protesta nis kundër padrejtësisë dhe përfundon duke i bërë padrejtësi qytetarit të zakonshëm, ajo ka humbur pikërisht arsyen për të cilën doli në rrugë.

©Copyright Vox News

Ky artikull është ekskluziv i Vox News, gëzon të drejtën e autorësisë sipas Ligjit Nr. 35/2016, "Për të drejtat e autorit dhe të drejtat e lidhura me to". Shkrimi mund të ripublikohet nga mediat e tjera vetëm duke cituar Vox News dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016


Në përputhje me standarded JTI

Video

SHIKO KANALIN NE YOUTUBE
×