Votë historike në Bundestag! Gjermania heq "frenat e borxhit" dhe i hap rrugën investimeve miliardëshe në mbrojtje dhe infrastukturë

Parlamenti i Gjermanisë miratoi këtë të martë një projekt-ligj historik që zhbllokon një nivel rekord të huamarrjes shtetërore për mbrojtjen dhe infrastrukturën duke amenduar rregullat fiskale të vendit të parashikuara me kushtetutë.

Votimi kaloi në parlament me 513 vota pro, nga 489 vota të nevojshme.

Ligji ka ende nevojë për dy të tretat e shumicës në Bundesrat, dhoma e ulët e Gjermanisë që përfaqëson shtetet e vendit, për t'u bërë ligj.

Votimi vendimtar në Bundestag pasoi disa javë debatesh të nxitura kur Unioni Kristian Demokrat (CDU) i Merz-it dhe partnerët e mundshëm të koalicionit Social Demokratët (SPD) zbuluan planet për të çliruar qindra miliarda shpenzime përmes lehtësimit të "frenave të borxhit" të garantuar me kushtetutë të Gjermanisë.

Merz u përball me një garë të tensionuar për ta shtyrë propozimin përpara mbledhjes së parlamentit të ri më 25 mars, ku partia e majtë Die Linke dhe e djathta ekstreme Alternativa për Gjermaninë (AfD) do të kishin aftësinë për të bllokuar paketën.

Të Gjelbrit fillimisht hezituan të ofronin mbështetjen e tyre për projektligjin derisa Merz javën e kaluar i dha partisë garanci se 100 miliardë euro nga fondi special do të drejtoheshin për të mbështetur masat e transformimit ekonomik të klimës.

Marrëveshja historike shënon një largim nga dekadat e konservatorizmit fiskal. Nga propozimet, shpenzimet e mbrojtjes mbi 1% të produktit të brendshëm bruto të Gjermanisë përjashtohen efektivisht nga "freni i borxhit" të vendit, i cili u shkrua në kushtetutë në vitin 2009.

Një fond special prej 500 miliardë eurosh do të krijohet gjithashtu për të financuar projekte infrastrukturore jashtë buxhetit të zakonshëm gjatë dekadës së ardhshme dhe për t'u dhënë 16 shteteve të Gjermanisë liri veprimi për të marrë hua rreth 16 miliardë euro.

Merz, i cili bëri fushatë kundër reformimit të frenimit të borxhit gjatë gjithë karrierës së tij, e ka përshtatur kthesën e tij si të nevojshme në përgjigje të një peizazhi të ndryshueshëm të sigurisë.

"Miqtë tanë në BE po shikojnë nga ne po aq sa kundërshtarët tanë dhe armiqtë e rendit tonë demokratik dhe të bazuar në rregulla," tha Merz të martën përpara votimit.

Ministri i Mbrojtjes Boris Pistorius mbrojti vendimin për të hequr rregullat fiskale për të investuar në mbrojtjen e Gjermanisë, duke përfshirë ushtrinë e saj mjerisht të pafinancuar.

"Siguria jonë nuk duhet të rrezikohet nga kufizimet buxhetore," tha Pistorius, duke shtuar se "kushdo që heziton sot po mohon realitetin".

Disa nga kritikat më të forta në parlament të martën erdhën nga AfD dhe Partia Liberale Demokratike e Lirë (FDP), kjo e fundit që u përpoq të prishte paketën duke sugjeruar një ndryshim të minutës së fundit.