Votat nga Greqia, Celibashi: Nuk janë gjetur parregullsi, të numërohen

Kreu i KQZ-së, Ilirjan Celibashi ka vendosur për hapjen e kutive dhe numërimin e zarfeve të votave të ardhura nga diaspora shqiptare në Greqi.

Celibashi tha se nuk janë gjetur parregullsi, ndaj numërimi duhet të vijojë. Kreu i KQZ tha se ky vendim merrej vetëm nga KQZ dhe më pas vlerësohej nga KAS apo Kolegji dhe kurrsesi asnjë grup numërimi dhe komision nuk kishte të drejtën të vendoste nëse do numërohej apo jo.

Partia Demokratike kërkoi bllokimin e numërimit të votave të diasporës në Greqi, me pretendimin se kishte parregullsi.

"Asnjë kuti nuk është vlerësuar e parregullt. Ndaj për këtë arsye, Komisioni Shtetëror i Zgjedhjeve vendos vazhdimin dhe përfundimin e numërimit dhe të vlerësimit të çdo dokumentacioni zgjedhor të votuesve nga jashtë të ardhur në KQZ, si dhe tabelimin e rezultateve përkatëse për subjektet zgjedhore, kandidatët që i janë nënshtruar votimit për çdo qark.

Ky numërim përfshin gjithashtu edhe zarfet që nuk janë shqyrtuar dhe janë administruar sipas vendimit të Komisionit Shtetëror të Zgjedhjeve. Ky vendim hyn në fuqi menjëherë”, tha Celibashi.