Mori peng fierakun për 400 mijë paund/ Kush është Nekid Arapi, u kap sot nga Policia angleze

2 Tetor 2022, 20:34Aktualitet SHKRUAR NGA REDAKSIA VOX

Detaje të reja janë zbuluar me pengmarrjen e ndodhur në Britaninë e Madhe, ku për ditë të tëra u mor peng dhe u torturua Nertil Buzi, 30 vjeç, nga Fieri.

Deri më tani është mësuar se në pranga kanë përfunduar: Nekid Arapi, 26 vjeç, banues ne Atterbury Road, Haringey, akuzohet për rrëmbim person, posedim me qëllim shitje lëndë narkotike kanabis dhe kërcënim për të vrarë; Xhon Guveli 28 vjeç, akuzohet për rrëmbim person; Fation Arapi, 27 vjeç, banues ne Neë Road, Peterborough, akuzohet për rrëmbim person; Armando Brahashaj, 26 vjeç, banues në Aylestone Avenue, Brent, Londër, akuzohet për rrëmbim person; Eduart Cepele, 30 vjeç, banues në Barrington Street, Mancester, akuzohet për rrëmbim person dhe Emanulea Arapi 28 vjeçe, banuese në Barrington Street, Mancester akuzohet për burgosje të rreme.

Por nga kërkimi i bërë deri më tani, vetëm një rezulton me precedentë penalë, edhe pse shumica e të arrestuarve konsiderohen si anëtarë të një grupi kriminal nga Vlora që kontrollonte disa shtëpi bari ngritur Manchester dhe qytete të tjera të Anglisë.

Nekid Arapi akuzohet si një ndër të përfshirëve në vrasjen e ndodhur më 4 Qershor 2018, ku u qëllua për vdekje biznesmeni 29-vjeçar, Vasil Dervishaj. Asokohe, kreu i Policisë së Vlorës, Gentjan Shehaj tha se janë identifikuar dy autorët e dyshuar të krimit, E.A, 31-vjeç, A.C, 28-vjeç, të dy lindur në Tepelenë dhe banues në Vlorë. Ndërsa në pranga përfunduan dy bashkëpunëtorët e vrasësve Nekid Arapi dhe Amarildo Grembi (Muka). Mesa duket pas vuajtjes së dënimit Arapi është nisur në Angli, ku ka vazhduar "punën" e re. 

30-vjeçari Buzi shqiptar u mbajt peng për një javë nën kërcënimin se do ta vrisnin nëse nuk paguheshin 400 mijë paund nga te afërmit e të marrurit peng. Shkaku pengmarrjes dyshohet se është përplasja mes dy grupeve rivale në kontrollin e shtëpive të barit. Shuma pretendohej se ishte fituar nga puna e përbashkët e tyre dhe nuk ishte ndarë si duhet, ndaj dhe morën peng.

Video