Bllokuan rrugën në protestën e djeshme para Bashkisë, procedohen shtatë persona

Policia e Tiranës ka proceduar penalisht 7 mbështetës të Partisë Demokratike dhe Aleancës për Teatrin, të cilët morën pjesë në protestën e opozitës përballë Bashkisë Tiranë ditën e premte.

Sipas policisë, procedimi i këtyre shtetasve u bë për shkak të bllokimit të rrugës për qarkullimin e mjeteve.

Uniformat blu deklarojnë se këta persona vendosën një automjet në mes të rrugës përapra bashkisë Tiranë, duke ndaluar qarkullimin e lirshëm në këtë aks.

Materialet procedurale në ngarkim të tyre i kaluan Prokurorisë për veprime të mëtejshme.

“Specialistët për Hetimin e Krimit në Komisariatin e Policisë Nr.1, në vijim të veprimeve hetimore e procedurale të kryera nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, proceduan penalisht në gjendje të lirë shtetasit: A.L, 24 vjeç, E.V, 33 vjeç, B.K, 38 vjeç, A.K,53 vjeç, K.B, 36 vjeç, E.E, 35 vjeç dhe G.S, 56 vjeç, të gjithë banues në Tiranë”, njofton policia.