TikTok përballet me qeverinë amerikane në Gjykatën e Supreme: Qeveria kineze mund ta shndërrojë në një armë, në çdo kohë

Përfaqësuesit ligjorë të rrjetit social TikTok janë duke u përballur në Gjykatën e Supreme të SHBA-së pas vendimit që kërkon nga rrjeti social me pronarë kinezë të shitet te investitorë jo-kinezë ose të ndalohet në SHBA.

Ky ligj hyn në fuqi në datën 19 janar.

Gjyqtarja Amy Coney Barrett pyeti avokatin e TikTok, Noel Francisco, pse kompania kineze “ByteDance” po refuzon me kaq kokëfortësi të shesë rrjetin social.

“Ju vazhdoni të thoni mbylleni. Ligji nuk thotë se TikTok duhet të mbyllet. Ai thotë se ByteDance duhet të heqë dorë nga TikTok. Nëse ByteDance do të largohej nga TikTok, ne nuk do të ishim këtu, apo jo? Nëse ByteDance do të ishte i gatshëm t'ju linte të ikni dhe do të donte t'ju lejonte të merrnit “kodin source”, a nuk do të ishte mirë?… Pse është e pamundur të hiqni dorë në 270 ditë, edhe duke supozuar se qeveria kineze nuk ju kishte thënë nuk mundej?”

Francisco u përgjigj: “Ka dy arsye themelore. E para është se kodi “source” themelor kërkon një ekip inxhinierësh për të krijuar dhe mirëmbajtur. Do të na duheshin shumë vite për të rindërtuar një ekip të ri inxhinierësh për ta bërë këtë. Në lidhje me ndarjen e përmbajtjes, në teori, ne mund t'i dërgojmë shitësit tanë në mbarë botën për të riregjistruar të gjithë përdoruesit tanë në një platformë të re”.

Elizabeth Prelogar, Avokatja e Përgjithshme e SHBA, tha në deklaratën e saj hapëse, "Qeveria kineze mund të armatizojë TikTok në çdo kohë për të dëmtuar Shtetet e Bashkuara".

“Kontrolli i qeverisë kineze i TikTok përbën një kërcënim të madh për sigurinë kombëtare. Askush nuk e kundërshton që Republika Popullore e Kinës kërkon të minojë interesat e SHBA-së duke grumbulluar sasi të mëdha të dhënash të ndjeshme për amerikanët dhe duke u përfshirë në operacione të fshehta të ndikimit. Askush nuk e kundërshton që Kina i ndjek ato qëllime duke i detyruar kompanitë si ByteDance të dorëzojnë fshehurazi të dhënat dhe të zbatojnë direktivat e qeverisë kineze”, u shpreh ajo.

Ligji që çoi në këto argumente para Gjykatës së Lartë të SHBA-së thotë se ByteDance ose duhet t'ia shesë TikTok një pronari jo-kinez ose të kufizojë aksesin në aplikacion në SHBA. TikTok ka thënë se investimi "nuk është i mundur teknologjikisht, komercialisht ose ligjërisht". Pekini ka treguar se nuk do ta miratonte një shitje të tillë.