KRYENGRITJA/ Rebelohen deputetët e PS-së, marrin zvarrë të Gjatin të votojë ndarjen territoriale!

 Kliko këtu për të tjera
Voxpress:

Prag skandali në Inteligjencën amerikane

2 February 2026, 17:29Kosova&Bota SHKRUAR NGA REDAKSIA VOX

Prag skandali në Inteligjencën amerikane

Një zyrtar i komunitetit amerikan të inteligjencës ka depozituar një ankesë si sinjalizues (whistleblower) ndaj drejtoreshës së Inteligjencës Kombëtare të SHBA-ve, Tulsi Gabbard, por dokumenti tepër i klasifikuar ka mbetur i bllokuar brenda agjencisë së saj për më shumë se tetë muaj, pa iu përcjellë Kongresit.

Rasti ka shkaktuar përplasje të vazhdueshme institucionale mbi mënyrën se si duhet trajtuar dhe ndarë ankesa me ligjvënësit, sipas zyrtarëve amerikanë dhe burimeve të njohura me çështjen.

Kështu raportohet në një publikim ekskluziv nga Wall Street Journal.

Ankesa është dorëzuar në maj të vitit të kaluar pranë Inspektorit të Përgjithshëm të komunitetit të inteligjencës.

Avokati i sinjalizuesit, Andrew Bakaj, e ka akuzuar zyrën e Gabbard se po pengon procesin, duke mos dhënë udhëzimet e nevojshme të sigurisë për transmetimin e dokumentit në komisionet e inteligjencës në Dhomën e Përfaqësuesve dhe Senat.

Nga ana tjetër, zyra e Gabbard i ka hedhur poshtë akuzat, duke i cilësuar pretendimet “të pabazuara dhe të motivuara politikisht” dhe duke theksuar se po përballet me rrethana të pazakonta për shkak të nivelit ekstrem të klasifikimit.

Sipas burimeve, përmbajtja e ankesës është aq e ndjeshme, sa që dokumenti mbahet i mbyllur në një kasafortë dhe zbulimi i tij mund të shkaktojë “dëme të rënda për sigurinë kombëtare”.

Ankesa përfshin gjithashtu pretendime që lidhen me një tjetër agjenci federale dhe mund të prekin çështje të privilegjit ekzekutiv, duke përfshirë edhe Shtëpinë e Bardhë.

Një letër e dërguar nga Bakaj në nëntor drejtuar Gabbard, e cila u vu në dijeni edhe te komisionet parlamentare të inteligjencës, informoi për herë të parë Kongresin mbi ekzistencën e ankesës. Megjithatë, edhe disa muaj më pas, ligjvënësit nuk kanë marrë dokumentin. Stafi demokrat në komisione ka tentuar të marrë informacion shtesë, por pa rezultat.

Ka mospërputhje edhe mbi vlerësimin e besueshmërisë së akuzave. Përfaqësues të Inspektorit të Përgjithshëm kanë deklaruar se disa pretendime specifike ndaj Gabbard janë cilësuar të pabesueshme, ndërsa për të tjera nuk është arritur një përfundim. Avokati i sinjalizuesit ka thënë se nuk është informuar për ndonjë vendim të tillë.

Sipas praktikës ligjore, Inspektori i Përgjithshëm duhet të vlerësojë brenda dy javësh nëse një ankesë është e besueshme dhe, nëse po, ta përcjellë atë në Kongres brenda një jave tjetër. Ekspertët e mbikëqyrjes thonë se një vonesë kaq e gjatë nuk ka precedent të njohur. Edhe pse ligji nuk vendos afate të sakta për udhëzimet e sigurisë nga drejtori i inteligjencës, zakonisht procesi mbyllet brenda disa javësh.

Rasti zhvillohet në një kontekst të ndjeshëm politik. Gabbard, një figurë e diskutueshme në administratën Trump, është raportuar se është lënë mënjanë nga çështje kyçe të sigurisë kombëtare dhe është angazhuar në hetimin e zgjedhjeve të vitit 2020.

Në vitin 2025, pas rikthimit të Trump në Shtëpinë e Bardhë, disa inspektorë të përgjithshëm u shkarkuan, veprim që demokratët e cilësuan si përpjekje për të dobësuar mekanizmat e pavarur të kontrollit.

Në tetor, Senati konfirmoi një Inspektor të ri të Përgjithshëm për komunitetin e inteligjencës, Christopher Fox, një ish-bashkëpunëtor i Gabbard, me vota vetëm nga republikanët. Asnjë demokrat nuk votoi pro emërimit të tij, duke shtuar më tej dyshimet për pavarësinë e procesit.

Ndërkohë, ankesa mbetet e mbyllur në kasafortë dhe Kongresi ende pret të shohë përmbajtjen e saj, ndërsa debati mbi transparencën, sigurinë kombëtare dhe përgjegjshmërinë institucionale vazhdon.


Në përputhje me standarded JTI

Video

SHIKO KANALIN NE YOUTUBE
×