‘Jo rritje të pensioneve’, Këshilla e Bankës Botërore për Qeverinë shqiptare!

Reforma e vitit 2014 e ka përmirësuar ndjeshëm skemën e pensioneve dhe raportin mes kontributeve të sigurimeve shoqërore dhe pensionistëve.

Por, emigrimi, informaliteti i lartë dhe nëndeklarimi i pagave po e dëmton.

Ky është vlerësimi i Bankës Botërore, që në tryezën e organizuar këtë të mërkurë me Qeverinë shqiptare propozoi me një gjuhë teknike ndërhyrjen përmes ndryshimit të skemës.

Ekspertët e Bankës propozuan zgjatje të viteve të punës për daljen në pension, që sipas tyre jo domosdoshmërisht rrit moshën për përfitimin e pensionit.

U propozua gjithashtu ndërhyrja në përmirësimin e barazisë së kontribuesve në sistem.

Banka Botërore nuk këshillon rritje masive të pensioneve, duke argumentuar se një gjë e tillë do të rrisë presionin ndaj skemës së kontributeve shoqërore.

Në vend të kësaj, bonuset, apo indeksimet suplementare në kuadrin e disa kushteve specifike, thotë BB, mund të aplikohen.

Në të njëjtën tryezë, Kryeministri Edi Rama pati rezerva për rekomandimet e Bankës Botërore.

Kreu i Qeverisë tha në fjalën publike se skema aktuale ka nevojë për përmirësim, por se ajo nuk do të preket.

Ndërkohë, ministri i Ekonomisë, Blendi Gonxhja vuri theksin te raporti mes të punësuarve dhe pensionistëve, që aktualisht është 1.1 me 1.

Ai u bëri thirrje qytetarëve që të refuzojnë pagesat në të zezë, bizneseve që të rrisin pagat dhe institucioneve shtetërore që të tkurrin pozicionet parazitare në administratë.