Zjarr i përmasave të mëdha në malin e Shashicës, flakët avancojnë drejt Tragjasit

Një zjarr i përmasave të mëdha ka përfshirë malin e Shashicës në Vlorë.

Flakët janë përhapur në drejtim të Tragjasit, duke djegur një sipërfaqe të konsiderueshme me bimësi, pemëtari dhe pyje pishash.

Zjarri është aktiv prej dy ditësh dhe është përhapur me shpejtësi të madhe, i nxitur nga era e fortë në zonë.

Dyshohet se zjarri është vendosur qëllimisht në disa vende, duke e bërë situatën më të ndërlikuar dhe të vështirë për t’u kontrolluar.

Në afërsi të zjarrit ndodhen dy stane bagëtish, por deri tani nuk ka informacione nëse janë shkaktuar dëme në këto objekte ose në gjedhë.